惡性通漲好快到，股市好快創新高

Technorati 的標籤：經濟

 

今時今日講起通漲兩個字，真係連牛頭角順嫂都知勁，買餐好小小閒閒地都過百蚊，人工又加得雞碎咁多，根本追唔到通漲，買時唯有就住就住，真係有苦自己知！

但通漲期間，樓市股市樣樣升，其實都幾好呀！如果通漲係因為經濟好轉，打工仔因加人工而帶動需求上升，從而令物價上漲，這種通漲可以說是健康的，就好像70至80年代的香港，一片欣欣向榮，市民大多活得開心。

但依家出現的通漲，是由資金泛濫所帶動，係過多資金追逐有限資源而出現的通漲，並不是由經濟好轉帶動，所以就算股市創新高，我地都感受唔到經濟繁榮的境象，反而通漲所帶來的壓力就日日感受到。

其實連我地小市民都知通漲的壓力，政府冇理由唔知，所以全球各國政府已做好兩手準備，同通漲對抗到底！人民銀行上月再上調存款準備金率0.5%，農行(1288)亦預期今年會繼續上調；印度央行在12個月內加息八次；歐洲央行行長特里謝已講明下次議息時會提議加息；其他亞洲各國如南韓、泰國、越南等都相繼加息以抗通漲來襲。

其實今次呢個通漲禍係美國搞出黎，美國本身都知，所以美國見依家經濟有小小苗頭，立即見好就收，QE2完成後，好大機會冇QE3。

可惜人算不如天算，聯儲局本來想收手，但日本一場大地震，日本央行二話不說接手印銀紙任務，本來已泛濫的資金，依家變成泛濫再泛濫，更多的資金只有做就更高的通漲，在資金你追我逐下，最後就變成惡性通漲，而且一定比預期來得快。

資金過多除了炒高資源價格，當然小不了流入股票市場，大量資金進入股市，結果當然是炒高股市，股市必定創新高，而且係高到你唔信個隻。有幾高？我睇過一篇分析，估恆指會直飆到6萬點！信不信就由你啦。