世界真的亂了，而且是人類有歷史以最亂的日子；原因是全世界各國政府都正在努力做同一件事情，仲要係鬥快，做乜野？之唔係鬥快將自家貨幣貶值，貶得愈快愈賤愈好，最好貶到變垃圾貨幣仲好。
美國、歐洲、日本不斷印銀紙攪量化寬鬆，目的只有一個，就係要美元、歐元同日圓貶值，刺激出口，幫國家救經濟。但問題係你又貶時我又貶，基本上已經互相抵消了影響，咁貶來有何用？
歐美日經濟差要救市，貶值本來無可厚非，但佢地貶得太過份，連累街坊；港元同美元掛勾，香港人已深深體會到港元貶值所帶來的痛苦及無助。
現在連瑞士央行都頂唔順，要瑞士法郎自我貶值同歐元掛勾，即係話要同歐元一齊死；消息一出，匯市立時風起雲湧。
貨幣戰爭已正式展開，外匯市場炮火連天，如果連‘最安全’的瑞郎都要貶值自保，歐美日又如何應對？息率已減無可減，匯價又低無可低，如何貶值再貶值？
這場貨幣戰爭最後無論由誰勝出，勝出者必是未來霸主。但依我看，這場遊戲最終可能沒有一個贏家！
首先，今天第一樣要同自己說的，就是生日快樂，身體健康，此終人到中年，健康就是財富！
說回正題，你沽清手頭上的貨未？由星期初恆指開始反彈，一個星期已經反彈近二千點了，高位接近21000點，坊間很多報章紛紛改口說恆指中期見底，呼籲大家撈底，最高目標上望24000。
對於這些所謂分析，筆者看過後只會笑笑，不當一回事。我反而相信自己，股市短期已經到頂，於是身體力行，所以我沽恆指！
其實投資者入貨前，首先問問自己，為何股市會上升？純炒QE3？貝公早前聯儲局會議上根本沒有題及QE3，只是坊間有人借意炒起股市，給市場一個期望，當大家見股市由低位急速上升，以為市場真的炒QE3之際，些際股市就借小小壞消息，反手炒落，殺大家一個措手不及，如果你這兩天才接貨，唯有說句，願天主保佑！
昨晚，市場便因為美國非農業職位錄得零增長，導致道指急跌258點，下星期港股會點？你話呢？
近日因市場憂慮美國經濟，評級機構標準普爾(Standard & Poor’s)下調美國長期主權評級，加上歐債危機下，美股出現恐慌性拋售，環球股市大幅下瀉，港股於三星期內大跌接近4000點；筆者上次曾指出指恆會直插至19000點，結果一箭中紅心，Bingo！
但刻下最擔心的，不是美債、歐債、中國地方債等等危機，而是人類史上一次大規模貨幣逃亡潮，可能於不久將來便會發生。不是危言聳聽，這是真的會發生的，而且一旦發生了，情況會是一發不可收拾的，是災難性的。
一切根源，源於上世紀，人類發明貨幣，取代真金白銀做交易開始。本來這是貨幣制度的一次大躍進，但隨放棄金本位開始，而人類貪心的本性不斷增加下，貨幣供應量亦隨之增加，以至將近失控的地步，貨幣所本身所反影的金錢價值，亦隨日子慢慢而失去；可以想像，我們日常所用的貨幣，可以隨時變成廢紙，尤其在戰亂時，手持貨幣等同我持垃圾，一旦爆發戰爭或政局不穩如索馬里等國，人們只會搶奪糧食及日用品如白米麵包等，因手上貨幣幣值不斷下跌，通漲原全失控，可以每日以倍數上升，今日買一包白米要一百元，明天可能要一千元，若嫌貴不買，後日可要一萬元才買到。原因不是白米本身價值上升，相反是銀紙本身價值下跌所至。
現在情況雖未至戰亂，但美國、歐洲、日本、中國大家一起鬥印銀紙，現在全世界期待聯儲局會推出QE3救市，但有沒有想到這是將美元以至整個貨幣制度推至瀕臨崩潰的邊緣；黃金價格不斷創新高，正正是對貨幣制度投不信任的票。
黃金已然突破1800美元關口，此刻可能有些少超買，但長遠計，just in case，買番幾舊放入保險箱，應該唔會死錯人！
唔好話我衰，今日恆指一瀉千點，真係好耐未試過感覺咁暢快，哈哈！講真，升好跌好，最緊要有方向，最怕唔上唔落無方向，上落市又悶又難玩，今日一跌千點，總算有個大方向俾大家。今日恆指埋單計無左939點，收報20,946，成交急升至1247億。大跌遇上大成交，睇怕港股短期都無乜運行，仲記唔記得個半月前我寫過篇文章，我估恆指會直插到萬九點？現在有機會‘夢想成真’。
講番今日跌市，有人馬後炮話因為美國經濟數據差，加上歐債危機未除，於是……沽貨走人！呢個解釋，唔係話佢錯，但我肯定唔收貨。試問聲，美國經濟如此差勁，係咪今日至知？歐洲有幾大鑊，又係咪今日至發生？點解上個月唔驚，上禮拜唔驚，今日突然咁鬼驚？無他，純粹大戶玩o野！唔信？唔好又俾我估中，班大戶想玩鋪大，但可能係最後一鋪，狂沽股票，推低股市，做到市況低迷，成副經濟敗局款，相信不出兩個月時間，聯儲局就會按耐不住，推出新一輪救市方案，即係成日講o既QE3，到時股市既已在低位，反彈都易D。但諗深一層，大戶要賺盡，豈會滿足於區區二三千點，我估會見番07年高位，即3萬點。計一計，由萬九升上3萬，足足有萬一點，應該滿足啦！
不過到時銀紙更貶值，黃金白銀更添價值！大家有無留意，自從美國通過美債上限後，金價就日日創新高！無他，大家已預期美國一旦通過加大上限，新一輪救市方案應該為期不遠。所以在預期美元會不斷或者加快下跌時，買黃金保值是不二之選，就連南韓央行都高位入市，可想而之大家對美元點睇。
至於香港，一向是大戶提款機，響股票市場提完款，下一步會在那個市場提款？諗諗o下，樓市好似橫行o左一段時間，都係時候……。
今天，我們能預見而又有可能出現的黑天鵝，有以下幾樣：
1. 可能是最快出現的黑天鵝，就是下星期美國國會兩黨未能如期達成共識，美債未能及時提高上限，美國被迫違約，政府無力應付日常開支，無法運作，警民齊上街示威，暴徒乘機搶掠，政府宣布全國進入緊急狀況，全國由軍事接管。
2. 歐債不斷惡化，連累德、法也被降評級，希臘經濟改革措施失敗，歐盟及國際貨幣組織放棄救援，希臘成為首個違約國家。希債爆破，影響一浪接一浪，愛爾蘭、葡萄牙、西班牙先後爆破，最終令歐盟解體，歐元一夜間消失。
3. 中國調控失敗，通漲惡化，地方政府十萬億債務爆破，令國有銀行破產；市民紛到銀行提錢自保，銀行擠提，全國銀行體系崩潰。資金大幅度流走，人民幣急跌，通漲每日以倍數上升，民間領導人出現，帶領民眾反抗政府，內戰一觸即發。
4. 全世界人們對貨幣制度不再信任，爭相搶購黃金白銀等‘真貨幣’，金價瘋狂升上十萬美元一安士；各國政府為求奪取黃金控制權，出兵強搶，第三次世界大戰正式開始。
以上假設，照目前情況來看，未必會發生，當然亦無人願意看得見；但如果以上其中一項真的發生了，其餘三項很大機會相繼出現，即是一係唔o黎，一o黎就四樣一齊。
最後會點？瑪雅人曾經預言2012係世界末日，咁你又信唔信？
講完樓市，正想講講美債同量化寬鬆時，冷不防被聯儲局主席貝南克搶先一步，自行爆料先，在聽證會上透露聯儲局可能考慮推出額外貨幣刺激措施，即QE3是也。消息一出，道指立即反彈過百點。(呢幾日道指又腳軟因貝公又突然反口出彈弓！)
正如桂花池之前在‘撤底失敗的聯儲局’一文中已經指出，市場是貪心的，他們會用盡一切方法，即使推倒市場，亦要迫使聯儲局再推量化寬鬆。錢，是沒有人嫌多的，更何況是一班貪得無厭的大鱷？如果聯儲局真的聽命行事，那表示聯儲局的聲望及名譽地位已盪然無存，它只是一個專門為一班永不滿足的銀行家服務及只懂不斷印銀紙的垃圾中央銀行吧了！美元貶值？關我庇事！通漲惡化？與我何干！再印多十萬八千億就最合我心意。
雖然貝公爆響口講QE3，但佢並沒有提到何時推出及規模有多大，講D唔講D，玩下你班友仔。
不過我估計推出時間應該在今年第四季，因為現時令總統奧巴馬最最頭痕的，是兩黨為提高美債上限的爭坳。其實明眼人都知兩黨議員在玩野，共和黨極之聰明，在大選前一年乘機發難，迫令奧巴馬政府屈服，而最終目的當然希望他不能連任。
所以只要奧巴馬或民主黨願意作出讓步，增加美債上限方案是必定通過的，根本不用擔心，班國會議員做場戲俾大家睇o者。一旦美債問題解決，推出QE3便是時候了，因為正好用來購買美債！其實由有QE1至QE2以來，美聯儲局已經正為美債最大買家，即係話依家美國其實係自己印銀紙俾自己用，理論上美國係可以無止境地印銀紙去支持自己的，但負作用是美元會不斷貶值。
睇番轉頭，其實聯儲局都唔想持有太多美債，雖然技術上可行，但畢竟債卷是向別人/國借錢的一張借據，豈有人自己借錢給自己！但中國政府已表明儲備要多樣化，即係已經睇穿了美國政府的板斧，就係通過美元不斷貶值去淡化美元債務，所以中國政府已不想再增持美債，真係你買埋我份啦！至於歐洲方面，都唔駛我講，大家都知依家歐洲係乜野情況，顧掂自己先算，美債？我理得你呀！日本呢，大地震後已經五勞七傷，核輻射問題未解決，又係得閒死唔得閒病個隻，仲點理到你呀！
所以美債失去呢幾個大買家後，只好自己顧自己，自己印銀紙俾買自己債卷。但另一問題又出現，就係錢可以無限量地印，只是聯儲局開綠燈就得，但增加美債上限，就要國會通過，就算印好銀紙都冇得過你買，所以一定要通過增加美債後，QE3才可正式啟動，所以貝南克一爆完推QE後，第二日就知衰，即改口又話冇QE，貝公一時口快，衰o左！
所以係下月初死線前，是不會再有QE消息出街，直至方案通過，聯儲局就可正式開工，再印錢紙是也！時間方面，4Q就差唔多啦，快D買多D黃金等升值啦！
上兩次桂花池題到有關內地收緊銀根，對香港的影響，咁究竟點影響我o地本土銀行借貸方向，又對樓市有乜o野影響？
上星期三晚，人行宣布自7月7日起上調存貸基準利率25個基點，是中央實施緊縮政策之後第五次加息。由於上半年食品價格累計上升達6.3%，故中央仍然極度關注通漲問題，打壓絕不手軟。亦因此，有分析員預期，除加息外，人行可能再上調準備金率，使內地銀根進一步收緊。
但中央收緊銀根，除打壓通漲外，連正常需要錢銀週轉的企業亦一拼打壓下來，尤其中小企業，若它們借不到錢，而令週轉不靈，分分鐘關門大吉。講真，唔怕得罪講句，令到內地中小企如此艱苦經營，是中央一手做成。
一切皆因錢作怪，由四萬億救市，變十萬億地方債危機，全因錢太多同亂咁駛錢。中央終於明白問題所在，於是立下決心，實施緊縮政策，好讓市場熱錢慢慢退回。於是人行左一拳加息，右一拳加準備金，最受害係那些真的需要錢銀週轉的中小企業，他們問銀行借唔到錢，唯有問財務公司借，聽說息口高達30厘。
窮則變，變則通，內地銀行唔借，一於南下問香港銀行借。香港銀行求之不得，因近年樓市暢旺，銀行大量貸款皆借去做樓宇按揭，但在樓按利率長期低企下，銀行真的冇乜肉食。現在有新客路自動找上門，而企業借貸息率比樓按高，銀行自然樂於做此新生意。
亦因此，銀行不用再在樓按市場上爭個你死我活，對樓按市場態度亦開始轉變。
首先由H按下手，因銀行同業拆息真的十分低，以此做基準做按揭，銀行冇啖好食。因應內銀抽緊銀根，資金成本上升，於是加H按息便理所當然。匯豐(0005)、中銀(2388)等大銀行相繼加息，最新H按已高於傳統P按了，而銀行目的只有一個，就是要驅逐樓按由H轉回去P，待大部份樓按重回P按市場時，就開始加P按息。
但我們有聯匯制度，美國不加息香港如何加？非也，香港銀行根本不用等待美國加息，自己亦有條件加息。大家不要忘記香港P按是用P減的，例如中銀最新P按是P減2.7厘，即2.3厘，如果中銀減少優惠，假設只減2.2厘，那中銀在優惠利率不變下，已將按揭利率加了半厘息了。所以有人經常說美國有排未加息，香港不用驚加息等等，真係信佢就死。
樓市除了銀行加息因素利淡外，另一因素係政治風險亦正不斷上升。七一上街的人中，有大部份是抗議地產霸權，遊行人數大幅上升，挑起中央條神經線，曾特首立即說港樓升幅好恐怖，加上早前港澳辦王光亞出言說要特首留意樓市，故政府絕對有理由再出招對付樓市，政治風險已不容忽視。
