最近，天氣開始轉變，氣溫比前感覺涼快不小，連最怕熱的太座，晚上睡覺時，亦不用開冷氣了。原來，在不經不覺之間，我們已渡過秋天，踏入冬季。近日環球股市受到歐債危機、美國經濟衰退以至中國爆煲等因素影響而輾轉下滑，不經不覺股市亦已進入冬季，當然港股亦不能例外，上週五收報17,592點，相比八月時23,000點高位已下跌23%。原來熊市在大家仍高呼23,000點時，已俏俏然站在我們身邊了！
有人說，2008年金融海嘯，原因是雷曼倒閉，當時恆生指數跌落谷底10,676點，如今未聞有大型金融機構出事，指數理應不會再跌穿11,000點！但如果你問我，我會說：「如果雷曼爆煲可以令恆指跌穿11,000點，咁點解歐洲爆煲唔可以再跌穿11,000呢！」試想想，雷曼雖是一間體型龐大到不得了的金融機構，它倒下固然可以翻起巨浪，但難道整個歐洲倒下不及一間雷曼嗎？所以近日跌市，我覺得可能只是個開始。
何解睇得咁淡？就以金融海嘯雷曼倒閉為例。金融海嘯後，大家以為死梗！誰不知聯儲局突然推出‘劃時代新救市計劃’，即係量化寬鬆QE1，一次過印過萬億美元救市。之後09年再出QE2，再印6000億。市場水浸，熱錢湧入高風險市場，樓市更被節節推高，價格不斷上升，連曾特首都話升得好恐怖。股樓上升，一切原於市場錢多，經濟本身根本沒有改善過。
現在QE3推出無期，歐洲大大鑊隨時爆煲，中國問題不枉多讓，高通漲、溫州老闆走佬、全民放貸等等，真係問題多多，自身難保，而且現在幾乎所有資產價格都明顯比08年時，被大幅推高了很多。現在QE3希望落空，資產價格開始搖搖郤墮，金銀銅價急跌，樓市劈價走貨新聞經常見報，與兩年前比樓價金價日日創新高比較，真係兩個世界。
如果話現在是由08年高位32,000高位回落的牛市二期，理應不該跌穿18,000點頸線水平，所以不似是牛二調整。
如果是熊市呢？咁就大鑊啦！若是熊市，應該一浪低於一浪，08高位32,000，回落到09低位10,676, 再反彈上去年高位25,000，那麼下個低位應該會跌穿09低位10,676，熊市才算完美地完成。
咁跌穿10,676點，即係跌到幾多點？唔知！不過，如果由兩個高位相差22%計，照度下去，以最悲觀睇法，下個低位應該比上次低位低22%才對，咁即係8,340點！亞媽，好驚呀！
沒有留言:
張貼留言