加息夢驚魂

Technorati 的標籤：經濟

中國、歐洲、印度及亞洲各國在過去幾個月都先後加息，反影通漲問題已殺埋身。既然要打壓通漲，理應不斷加息直至通漲投降為止，但各國對加息態度上，又好似決心不大，又想加又想唔加，好似歐洲央行行長特里謝，加息前態度堅決，但加息後態度立即軟化，似有難言之隱，究竟所為何事？

在是否有QE3之前，聯儲局內部已經有爭坳QE2應否提早結束，姑匆論QE2能否繼續甚或有冇QE3，美元長線向淡已是市場共識，近日債王格羅斯(Bill Gross) 就身體力行，以行動「支持」美元下跌，將由其管理的PIMCO Total Return基金內的美債全數沽清，擺明睇淡美元，賭QE2後美債急跌孳息上升。

身為債王，格羅斯的觀點想法自必有其道理，而他的一舉一動亦為市場關注。假如真係俾佢買中，QE2後美元不斷下跌(其實現在已經係咁！)，甚至出現急速下瀉，咁樣大部份以美元計價的原材料及商品價格，如石油、銅價、煤價同黃金都會立即爆升，通漲亦如坐火箭直飛上太空。

其次，因匯率是相對的，響咁情況下，如果其他各國早過美國加息，只有加添美匯下跌壓力，之所以就算全世界都預期大通漲潮即將殺埋身，都唔咁敢大幅加息原因！

照咁樣推斷，通漲咪會失控？又未必！我覺得最有可能出現情況有兩個，視乎聯儲局取向。

第一，假設QE2後唔再推QE3，聯儲局停止買債，債卷需求一下子出現真空，令孳息上升，同債王預期一樣，除非聯儲局真係好陰謀咁放棄美元，否則只有加息一途才能拯救美元。而且美國仲會因美元下跌，變相變成輸入通漲，對美國經濟有好大影響，不利奧巴馬選舉連任，響政治同經濟壓力下，佢一定要保住美元。QE2將於6月結束，所以就有人開始賭美國最快年尾加息。

第二，同上面相反，假設聯儲局最後通過推出QE3，咁就唔駛我講，相信大家都會估到美匯會立即直插谷底。到時市場更加多平錢四圍買，大通漲潮即到，你做初一我做十五，到時各國都唔駛再俾面美國，一定大手加息打擊通漲。

結論就係，息口由依家開始只會一路向上，直到降服通漲為止，相信此時亦是投資市場崩潰之時。